بعض اعطال الكهرباء وحلولها

hatim

المدير العام
طاقم الإدارة
#1
فني كهرباء

تعالو أوصف ليكم حاجات صغيرة مهمه
مشاكل الكهرباء المتكررة مع الخريف
في أعطال ممكن الزول يعالجها براه ويوفر علي نفسو زمن ومجهود
.
اول حاجه في شئ إسمو تامبر
يلا العداد الفي العمود فوق دا مرات بتدخلو مويه مطرة ..( لأنو أغلب العلب فاتحه )..العداد بقوم يأمن وبفصل الكهرباء طوالي ..الشاشه جوة البيت بتكون شغاله بس بتظهر فيها علامه لمبه صغيرونه كدة أسفل يمين الشاشه ..تحت أرقام الكيلومترات طوالي
في الحاله دي ولا تبلغ الكهرباء زاتو ..تمشي براك المكتب وتقيف في الكاونتر زي العايز تشتري كهرباء ..تقول للموظف أديني تامبر في رقم العداد دا ..بديك 20 رقم ( مجان وحات الله ) ..تمشي البيت تنزلها زي ما قاعد تنزل الكهرباء ..ومبروك مقدماً رجوع الكهرباء
العطل دا ممكن يتكرر كم مرة وكل ما تجي مطرة ..بس كل مرة بتطلب منك أرقام تامبر جديدة ..وبرضو مجانيه
العطل دا في الغالب بظهر أيام الخريف بس
.
2
علامه الكهرباء الظاهرة في الشاشه ..علامه عامله كيف كيف كدة ..بتشبه حرف ال Z المقلوب كدة
المهم العلامه بتكون ظاهرة مرات والكهرباء قاطعه ..العلامه دي معناها الكهرباء من العداد الفوق دا واصله ..المشكله معناها في رخاوة في الزاويه أو في التأمين الداخلي للبيت
لو عندك خبرة في الكهرباء أعمل تيست براك للزاويه أو الفيوز أو مخرج الكيبل ( بي لمبه البيان )
لو لقيت الكهرباء واصله معناها العطل داخل البيت و دا داخل في دائرة إختصاصك ..والكهرباء ما عندها بيهو شغله
ولو ما عندك خبرة جيب كهربجي يخليهو يعمل الحركه ويحدد ليك العطل حقك ولا حق ناس الكهرباء
طبعا عادي ممكن زول يكون قاطع يومين وفي النهايه العطل يطلع داخلي ..
3
مرات الشاشه بتعمل خطوط متقطعه ..و دا معناها في حموله زايدة ...المطلوب منك تفصل الأجهزة الكهربائيه كلها داخل البيت وتخليها كم دقيقه (5 دقايق مثلا) وتبدأ تشغل الأجهزة حقتك واحدة واحدة ..و يا حبذا لو شغلت الضروريه والقدر حوجتك بس
ولو المشكله ما إتحلت نزل أرقام التنشيط دي
56493153725450313471
الأرقام دي أرقام تيست للعداد ..بتنشط العداد وبتختبرو ..ولو ما نجحت الحركه دي معناها العداد معطل ومفروض عربيه الطوارئ تجي تعالج ليك المشكله
.
آخر شئ و إعتبروها معلومه
المكوة ما بتكمل الكهرباء ولا بتضعفها
أكتر الحاجات البتستهلك الكهرباء
المكيفات حقت الكهرباء ( فريون وإسبيلت)
السخان
الغساله
الفرن
حاولو ما تشتغلوهم كلهم في لحظه واحدة عشان ما تحصل حموله زايدة......

منقوول