الغمته (مشاركة شخص بالمال فى المناسبات)

hatim

المدير العام
طاقم الإدارة
#1
الغمته

عاده سودانيه حميده جدا ومنتشره.. ولو انها قلت او كادت ان تختفي في السنين الاخير ..

أو ربما تحولت من شكلها التقليدي القديم واصبحت تأتي في شكل تحويل رصيد أو (شيرنق) في الزنقات بين الأصحاب او الزملاء.

وللغمته طعم ومذاق خاص اذ انها بتجيك احيانا وانت في امس الحوجه وخجلان تشحد و تطلب قريشات من زول حتي لو كان قريب منك شديد..

فبجي يغمت ليك.. لممممن ترتاح انت ذاتك..

والاجمل في الغمت دا انك بتكون ما عارف المغموت ليك كم !! فتبدي تسرح وتخطط للمشاريع الممكن تحققا بقيمة الغمته دي.. وتكون متشوق للحظه. الحتعرف فيها ادوك كم ..

ودا ما ببتم الا بعد مفارقة الزول الغمت ليك... (معقوله تحسبا قدامو؟ طالبو انت؟)

تتعدد أشكال الغمته. احيانا تجي في شكل ..حاجه كدا تحت المخده. ودي بتكون دايما في حالات .حديثي الولاده .. والمرض.. وغالبا ما تكون حصيلتا جامده .. لانو المخده دي ما بتترفع الا نهاية اليوم..

ايضا الغمت المباشر ودا في حالات وداع المسافر.. او مجامله في مصاب ا و حدث له مكروه.. او شي من هذا القبيل..

ربما يكون المغموت له ميسور الحال وما محتاج لي غمت الا أنه الواجب..
ومن ابهي صور الغمت هو الغمت للاطفال في الاعياد والمناسبات (غمته صغيرونه كفيله بادخال السرور.. وما اروع فرحة الاطفال).مرات الام والأب بيستولوا عليها
المؤلم في الأمر انك تمر بحدث يوجب عليك ان تغمت وتكتشف انك انت ذاتك محتاج يغمتو ليك.. (محرجه ياااخ)
واوعك تزور مريض في مستشفى تقوم تشيل معاك حلاوة!!
اغمت ليهو حق كيس او علبة الحلوي..
لانه يمكن أن تساهم في شراء دواء..
أغمتو لبعض و اكثروا من الغمت فالغمتات توثق العلاقات...
منقوله